Gjykata Themelore në Gjakovë ka shpallur aktgjykim dënues prej shtatë (7) vite burgim dhe 1,500 euro gjobë ndaj të pandehurve Xh.Th. dhe U.Th., të akuzuar për vjedhje të rëndë në bashkëkryerje në Teqenë e Madhe në Gjakovë.
Të dy të pandehurit, shtetas të Republikës së Kosovës, akuzoheshin për veprën penale “Vjedhja e rëndë” në bashkëkryerje, ndërsa Xh.Th. u gjykua gjithashtu për “Mbajtjen në pronësi, kontroll ose posedim të paautorizuar të armëve,” në bazë të Kodit Penal të Republikës së Kosovës (KPRK).
Sipas njoftimit për media, gjatë procesit gjyqësor të akuzuarit pranuan fajësinë, ndërsa gjyqtari Driton Sadiku shpalli aktgjykimin për dënimet e mëposhtme:
Xh.Th., u dënua me katër (4) vite burgim për “Vjedhje të rëndë” dhe një gjobë prej 1,500 euro për veprën penale të posedimit të paautorizuar të armëve.
U.Th., u dënua me tre (3) vite burgim për veprën penale “Vjedhje e rëndë.”
Ngjarja dhe detajet e vjedhjes
Sipas aktakuzës, më 20 maj 2023, rreth orës 21:40 deri në 22:34, të pandehurit, duke vepruar së bashku, realizuan një vjedhje të rëndë në shtëpinë e klerikut M.Sh., pjesë e Teqesë së Madhe në Gjakovë.
Ata përdorën informacione dhe pajisje të organizuara për të depërtuar në dhoma të mbyllura, duke marrë pasuri me vlerë të madhe, përfshirë:
– 114,000 euro;
– 60,000 franga zvicerane;
– 10,000 dollarë amerikanë;
– 1,000 paund britanikë;
– Stolira ari me vlerë prej 1,600 euro;
Para të tjera dhe mjete fetare të mbledhura për ndërtimin e një teqeje në Prizren.
Pas kryerjes së vjedhjes, të pandehurit u larguan me veturë, duke u përpjekur të fshehin gjurmët e tyre.
Vendimi i Gjykatës Themelore në Gjakovë u mor pas shqyrtimeve të hollësishme dhe pranimit të fajësisë nga ana e të pandehurve.