Luftëtarët e mbetur ukrainas të strehuar në fabrikën e çelikut Azovstal të Mariupolit janë dorëzuar, ka thënë ministria ruse e mbrojtjes.
Ministri Sergei Shoigu i raportoi presidentit Vladimir Putin mbrëmë se fabrika e çelikut Azovstal në Mariupol është çliruar plotësisht nga luftëtarët ukrainas.
Ministria tha se grupi që ishte dorëzuar përbëhej nga 531 persona, shkruan SkyNews.
“Territori i uzinës metalurgjike Azovstal është çliruar plotësisht”, tha ministria në një deklaratë.
Azovstal konsiderohej të ishte bastioni i fundit i madh në qytetin e rrethuar të Mariupolit dhe ishtepër shumë javë simbol i rezistencës ukrainase.
Qyteti port jugor ka qenë objektiv kyç për Putinin, pasi kapja e tij do të krijonte një korridor tokësor midis Krimesë së aneksuar dhe rajoneve të kontrolluara separatiste pro-ruse të Luhansk dhe Donetsk, të njohura si Donbas.
Braktisja e plotë e bunkerëve dhe tuneleve të uzinës së bombarduar nënkupton fundin e rrethimit shkatërrues.
“Objektet e nëndheshme të ndërmarrjes, ku fshiheshin militantët, ranë nën kontrollin e plotë të forcave të armatosura ruse”, thuhet në deklaratën ruse, duke shtuar se gjithsej 2,439 mbrojtës janë dorëzuar në ditët e fundit.
