Kandidati i PDK-së për kryeministër, Bedri Hamza, ka përkujtuar Deklarata Kushtetuese e 2 Korrikut të vitit 1990.
Ai ka vlerësuar se shpallja e kësaj deklarate ishte një moment i rëndësishëm politik dhe historik që i bashkoi shqiptarët.
Në profilin e tij në “Facebook”, Hamza ka shkruar se ajo ishte një akt i lartë kur edhe institucionalisht u shpreh vullneti i delegatëve shqiptarë për Kosovën, si njësi të pavarur dhe të barabartë me republikat e atëhershme.
“Veprimtarë të shumtë, brez pas brezi, bënë përpjekje që t’i realizojnë aspiratat e popullit për liri, pavarësi e demokraci. Aty ku e linte një brez, menjëherë e vazhdonte tjetri, deri në jetësimin e plotë të ëndrrës shekullore për shtetësinë tonë. Deklarata Kushtetuese e 2 korrikut 1990 ishte një moment tejet i rëndësishëm politik dhe historik që i bashkoi shqiptarët. Ishte një akt i lartë kur edhe institucionalisht u shpreh vullneti i delegatëve shqiptarë për Kosovën, si njësi të pavarur dhe të barabartë me republikat e atëhershme. Me peshën historike që bartën mbi supet e tyre, sot, 34 vjet pas, vazhdojmë të ndjejmë krenari për vendimin e guximshëm të delegatëve shqiptarë të asaj kohe. Ne kemi pasur gjithnjë burra e gra, djem e vajza, dalëzotës të Kosovës!”, ka shkruar ai.