Ndodh rrallë që një zyrtar i lartë i Kosovës të shkojë në Beograd. Një nga këso vizita të rralla e kishte pasur Enver Hoxhaj në vitin 2014, si ministër i Jashtëm. Ai ka treguar një incident që i ka ndodhur në një ashensor atje.
Zëvendëskryeministri Besnik Bislimi shkon nesër në Beograd, ku do të jetë pjesë e disa paneleve të diskutimeve. Kjo është një nga pak vizitat e zyrtarëve shtetërorë të Kosovës në kryeqytetin serb.
Në vitin 2014, ish-kryediplomati Enver Hoxhaj kishte vizituar Beogradin, me qëllime të njëjta si Bislimi. Ishte ftuar atje për të marrë pjesë në një konferencë ndërrajonale.
Hoxhaj më vonë e pati treguar edhe një ndodhi në një ashensor, sa ishte në Beograd.
“Unë hyra në lift me 2-3 bashkëpunëtorë të mi, por edhe me 10 policë ose 9 policë të tjerë edhe pse lifti ishte shumë i madh. Papritmas u këput sajlli që mbante liftin, dhe nëse s’gaboj nga gati i dytë ne përfunduam në bodrum”.
Ish-kruyedipomati kishte treguar se kur ishte përshendetur me homologun e tij serb, Ivica Daciq, ai i kishte thënë se nuk ka pasur tentim për ta vrarë atë.
“Kur ia kam zgjatë dorën Daçiqit, ai më tha; Enver nuk ka qenë përpjekje me të vra ty” ka thënë ministri Hoxhaj.
Konferencën e kishte hapur Ministri i tanishëm dhe i atëhershëm i Punëve të Jashtme të Serbisë, Ivica Daciq.
Asokohe, Hoxhaj e kishte cilësuar vizitën e tij si historike, pasi ishte e para e një zyrtari të lartë të Kosovës në Serbi.