Zbuloni disa nga ngjarjet më të bujshme në rrjet të javës që lamë pas…
1. Nëse flasim për komedi Krishtlindjesh, shumë tituj filmash mund t’ju vijnë ndër mend. Sigurisht në vend të parë është ndoshta “Home Alone”, por diku pas kësaj vjen dhe “Elf”. Rolin kryesor në komedinë e Krishtlindjeve “Elf” të vitit 2003 e ka luajtur Will Ferrell, i cili pas më shumë se 20 vitesh ka kujtime pozitive nga ky film. Në një intervistë të fundit për ‘People’, Ferrell shprehu mirënjohjen e tij që kjo komedi është kthyer në një nga më të preferuarat për t’u parë gjatë Krishtlindjeve. Duke folur për filmin, aktori tha:
Është vërtet i veçantë. Filmi vazhdon të rritet dhe të pozicionohet gjithnjë e më shumë si një klasik i festave. Jam i lumtur që kam një film të tillë në karrierën time.
2. Revista e njohur amerikane “Billboard” ka shpallur Beyonce-n si këngëtaren më të mirë të muzikës pop të shekullit të 21-të. Andrew Unterberger, redaktori i “Billboard”, shpjegoi se ky titull është rezultat i një vlerësimi të hollësishëm të arritjeve të jashtëzakonshme të Beyonce-s gjatë karrierës së saj. Me 32 çmime Grammy deri më tani dhe mundësinë për të fituar më shumë në ceremoninë e vitit 2024, ajo vazhdon të mbajë pozita të larta në industrinë muzikore.
3. Këngëtarja shqiptare me famë botërore, Dua Lipa së fundmi ka folur shqip në një intervistë. Në rubrikën “Çfarë ka në cantën time” të revistës së famshme ‘Vogue’, Dua ka thënë një fjali në shqip. “Hej Vogue, unë jam Dua Lipa, edhe ja se çfarë kena në çantë sot”-tha këngëtarja. Dua mban një çantë Hermes Birkin dhe ka zbuluar çfarë mban në të.
4. Leonardo DiCaprio është një nga aktorët më të njohur dhe më të vlerësuar të gjeneratës së tij. Karriera e tij është shquar për role ikonike, si ai i Jack në filmin “Titanic” dhe Jordan Belfort në “The Wolf of Wall Street“. DiCaprio fitoi çmimin e dëshiruar të ‘Oscar’ për rolin e tij të paharrueshëm në “The Revenant”. Kur është pyetur për aktoren që ai konsideron më të mirën, DiCaprio ka theksuar se Meryl Streep është ajo që e ka impresionuar më shumë.
5. Amber Heard ka konfirmuar se është shtatzënë me fëmijën e saj të dytë, pas ndarjes nga Johnny Depp në vitin 2016. Pas kësaj ndarjeje, aktorja e njohur solli në jetë vajzën e saj të parë, Oonagh, në prill të vitit 2021. Ajo e bëri të ditur lajmin e lindjes së Oonagh në një postim në Instagram, ku shpjegoi se kishte vendosur ta sillte në jetë fëmijën sipas kushteve të saj, pa u ndikuar nga presionet e jashtme./TAR