Mbretëria e Bashkuar vendosi të premten sanksione ndaj dy grupeve “ekstremiste” dhe katër individëve në Izrael, të cilët i fajësoi për dhunën në Bregun Perëndimor.
Zyra e Jashtme e Britanisë i quajti Hilltop Youth dhe Lehava si dy grupe për të cilat tha se dihej se kishin mbështetur, nxitur dhe promovuar dhunën kundër komuniteteve palestineze në Bregun Perëndimor.
Katër individët e sanksionuar ishin përgjegjës për shkeljet e të drejtave të njeriut ndaj këtyre komuniteteve, thuhet tutje në deklaratë.
Midis tyre janë Noam Federman, i cili ka trajnuar grupet e kolonëve për të kryer dhunë dhe Elisha Yered, i cili ka justifikuar vrasjen e palestinezëve për arsye fetare.
Dhuna në Bregun Perëndimor ishte tashmë në rritje përpara sulmit të Izraelit në Gaza, i cili u shkaktua nga një sulm i udhëhequr nga Hamasi më 7 tetor në Izraelin jugor.
Ajo është përshkallëzuar që atëherë, me sulme të shtuara ushtarake izraelite, dhunë nga kolonët dhe sulme në rrugë palestineze.
Ministri i Jashtëm britanik, David Cameron, tha se kolonët ekstremistë po minonin sigurinë dhe stabilitetin dhe po kërcënonin perspektivat për paqe, raporton Reuters, transmeton Klankosova.tv.
“Autoritetet izraelite duhet të shtypin ata që janë përgjegjës. Mbretëria e Bashkuar nuk do të hezitojë të ndërmarrë veprime të mëtejshme nëse është e nevojshme, duke përfshirë sanksionet e mëtejshme”, tha ai.
Të sanksionuarit do t’i nënshtrohen kufizimeve financiare dhe të udhëtimit. Britania vendosi më parë sanksione ndaj katër shtetasve izraelitë në shkurt.