Presidenti i SHBA Joe Biden deklaroi në krah të presidentit francez Emmanuel Macron se Rusia dhe presidenti Vladimir Putin duhet të mbajnë përgjegjësi për luftën kundër pjesës tjetër të botës.
“Putini mendon se mund të shtypë vullnetin e të gjithë atyre që kundërshtojnë ambiciet e tij perandorake, por sulmimi i infrastrukturës civile në Ukrainë, kriza e energjisë në Evropë për të rritur çmimet, përkeqësimi i krizës ushqimore, po dëmton njerëzit, jo vetëm në Ukrainë, por në mbarë botën. Dhe ai nuk do të ketë sukses”, tha Biden gjatë një konference dypalëshe për shtyp në Shtëpinë e Bardhë.
“Presidenti Macron dhe unë kemi vendosur që do të vazhdojmë të punojmë së bashku për ta mbajtur Rusinë përgjegjëse për veprimet e tyre dhe për të zbutur ndikimet globale të luftës së Putinit në pjesën tjetër të botës”, tha Biden.
Presidenti Biden ripohoi mbështetjen e SHBA dhe Francës për Ukrainën, së bashku me aleatët e tjerë evropianë.
“Sot ne pohojmë se Franca dhe Shtetet e Bashkuara së bashku me të gjithë aleatët tanë… qëndrojnë të fortë si kurrë kundër luftës brutale të Rusisë kundër Ukrainës. Ne folëm shumë për këtë në takimin tonë dypalësh,” tha Biden.
“Ne do të vazhdojmë mbështetjen e fortë për popullin e Ukrainës teksa ata mbrojnë shtëpinë dhe familjet e tyre, sovranitetin dhe integritetin e tyre territorial kundër agresionit rus, i cili ka qenë tepër brutal”, tha Biden. “E dija se Rusia ishte, por nuk e prisja të ishte kaq brutale”.
Biden falënderoi gjithashtu Macron për pranimin e refugjatëve ukrainas gjatë rrjedhës së luftës deri më tani.
Macron përsëriti zotimet e presidentit amerikan për mbështetje, duke thënë në fjalët e përkthyera se “ne mbështesim si ushtrinë ukrainase që po reziston” si dhe civilët ukrainas që po përballen gjithashtu me sulmet.
