Ylli i njohur i pop-it Beyonce, është shpallur artistja më e madhe pop e shekullit 21 nga Billboard, sipas një njoftimi të bërë të martën si pjesë e një serie vlerësimesh.
Sipas Andrew Unterberger nga Billboard, “Beyonce kryeson listën tonë të përzgjedhur nga stafi bazuar në 25 vite ndikimi, evolucioni dhe impakti të jashtëzakonshëm.”
Publikimi thekson se pozicioni i saj në krye të listës vjen si rezultat i angazhimit të saj për inovacion, evolucion dhe përsosmëri, duke e bërë atë standardin me të cilin maten të gjithë artistët e tjerë pop të shekullit të 21-të.
Me 32 çmime Grammy, Beyonce mban rekordin si artistja më e vlerësuar në historinë e këtyre çmimeve, shkruan CNN. Albumi i saj i fundit, “Cowboy Carter,” i ka siguruar 11 nominime të tjera për ceremoninë e vitit 2024, duke e vendosur atë në rrugën drejt më shumë triumfeve në janar.
Beyonce ka gjithashtu një histori të pasur në listat e Billboard. Me 9 këngë në vendin e parë dhe 24 të tjera në top 10 të Hot 100, si dhe 8 albume që kanë arritur majën e Billboard 200, ajo mbetet një ikonë e padiskutueshme e muzikës. Karriera e saj solo nisi fuqishëm në vitin 2003 me albumin “Dangerously in Love,” pas suksesit të madh me grupin Destiny’s Child.
Billboard ka filluar që nga gushti të rendisë 25 artistët më të mirë të pop-it të 25 viteve të fundit. Javën e kaluar, Taylor Swift u shpall në vendin e dytë, ndërsa Rihanna në të tretin.
Artistët e tjerë që përfshihen në top 10 janë Adele, Ariana Grande, Justin Bieber, Kanye West, Britney Spears, Lady Gaga dhe Drake. Në vendin e 25 është Katy Perry, ndërsa artistë të tjerë si Bad Bunny, The Weeknd, One Direction, Miley Cyrus, Eminem dhe Usher renditen ndërmjet tyre.