Barcelona ka shënuar fitore të thellë në shtëpi ndaj Young Boys, derisa Bayer Leverkuseni e fitoi derbin ndaj Milanit.
Katalunasit janë këndellur shpejtë pas humbjes shokuese nga Osasuna, duke fituar me rezultat 5:0 ndaj Young Boys.
Pas vetëm tetë minutave lojë Raphinha dhuroi një asistim te Robert Lewandowski, që kaloi Barcelonën në epërsi (8’).
Raphinha pastaj u përkujdes për golin e dytë, duke përfituar nga një top i kthyer (34’).
Vetëm tre minuta më vonë, Inigo Martinez e shënoi golin e tretë pas asistimit të Pedrit (37’).
Barcelona vazhdoi të dominojë edhe në pjesën e dytë. Martinez harkoi për mrekulli te Lewandowski, i cili shënoi për ta dërguar rezultatin në 4:0 (51’).
Fitoren e thellë të Barcelonës e vendosi një autogol i Mohamed Camara, që tentoi ta largonte topin nga goditja e Balde por e dërgoi në rrjetë (81’).
Kësisoj, Barcelona merr tre pikë në Ligën e Kampionëve, kurse Young Boys renditet në fund pa pikë.
Në anën tjetër, Bayer Leverkuseni e fitoi derbin ndaj AC Milanit me rezultat minimal 1:0.
Sfida mes dy klubeve ishte shumë e barabartë, me raste të njëpasnjëshme nga dy palët por mungoi finalizimi.
Boniface shënoi pas 20 minutave lojë, mirëpo që VAR-i e anuloi për pozitë jashtë loje.
Sidoqoftë, nigeriani doli sërish në skenë për ta bërë heroin te Leverkuseni pas asistimit të Frimpongut (51’).
Leverkuseni tani mbledh gjashtë pikë në fazën e ligës, kurse Milani mbetet pa pikë pas dy xhirove.