Kandidati i Partisë Demokratike të Kosovës për deputet me numrin 16 dhe ish-eprori i lartë i UÇK-së, Ferat Shala, ka kujtuar 26-vjetorin e themelimit të “Radios Kosova e Lirë”.
Shala ka shkruar në Facebook se “jehona e saj (Radios Kosova e Lirë) shpalli ardhjen e lirisë dhe fundin e forcave pushtuese serbe, duke rikthyer shpresën e një kombi të lënduar, por të pathyeshëm”.
Postimi i plotë i Shalës:
Sot është 26-vjetori i themelimit të radios “Kosova e Lirë”. Radio Kosova e Lirë nuk ishte thjesht një medium, por një kushtrim që thërriste për shpresë dhe qëndresë.
Përmes saj, dëshmitë e sakrificave të UÇK-së u shpërndanë dhe mbërritën në çdo skaj të Kosovës e më gjerë. Jehona e saj shpalli ardhjen e lirisë dhe fundin e forcave pushtuese serbe, duke rikthyer shpresën e një kombi të lënduar, por të pathyeshëm.
Ky zë, që ruan kujtimin e çdo sakrifice, do të mbetet i përjetshëm, ashtu si lavdia e luftës çlirimtare dhe nderimi për dëshmorët e lirisë.
Urime përvjetorin e një zëri që nuk e shuajti as zjarri i luftës!